კაკა : "ტრავმა არ არსებობს !"

ორშაბათის პრესკონფერენციაზე კაკამ უარყო ჭორები იმის შესახებ, რომ ტრავმა ისევ აწუხებს და განაცხადა, რომ ნელ–ნელა იბრუნებს ძველ ფორმას.

"თავს კარგად ვგრძნობ. ტრავმა აღარ მაწუხებს, მეტიც, ის სრულიად გაქრა, მაგრამ შემდგომი გართულებების თავიდან ასაცილებლად სპეციფიური პროგრამების გავლა მაინც მიწევს. წინა კვირას გავრცელდა ინფორმაცია, რომ დაზიანება ქრონიკული იყო, რაც სიმართლეს არ შეესაბამება."

"ყველაზე მეტად ის მაწუხებდა, რომ ფიზიკური კონდიციების გაუმჯობესებას ვერაფრით ვახერხებდი, ამიტომ მოედანზე იმის ვერ ვაკეთებდი, რაც მსურდა. ექიმებმა მთხოვეს, მოთმინება გამომეჩინა, ასეც მოვიქეცი, ახლა კი დღითი–დღე წინ მივიწევ."

"ესპანეთი არ არის ერთადერთი ადგილი, სადაც ამბობენ, რომ ძველებურად ვეღარ ვთამაშობ. ეს ბრაზილიასა და იტალიაშიც ხდებოდა, მაგრამ უბრალოდ სიმართლეს არ შეესაბამება."

"შაბათს გოლის გატანა მნიშვნელოვანი იყო, მაგრამ ყველაზე მეტად მაინც კარგი თამაში მომეწონა. საშუალება მომეცა, იქ მეთამაშა, სადაც მსურდა, მოედანზე სრული თავისუფლება მქონდა, ეს კი ძალიან მომწონს. აქამდე მზად არ ვიყავი, რაც საქმეს ართულებდა, ახლა კი ყველაფერი სხვაგვარადაა."

"ჩვენ შესანიშნავად ვთამაშობთ, ბევრ საგოლე მომენტს ვქმნით და თავს კარგად ვიცავთ. ახლა უკვე ყველა უკეთ ვუგებთ ერთმანეთს და ეს ყოველდღე მძაფრდება. "რეალის" შანსი, რომ თამაშის ხარისხი უმაღლეს დონემდე ასწიოს, ძალზე მაღალია."


"ჩვენ განვვითარდით როგორც ტაქტიკურად, ასევე ტექნიკურად. რასაც ვარჯიშებზე ვამუშავებთ, თავს თამაშებში იჩენს."

"ბენზემა ძალიან ნიჭიერი ფეხბურთელია. ის მნიშვნელოვან გოლებს იტანს და ყოველდღე უმატებს. ერთი ქვეყნიდან მეორეში გადასვლა და სათამაშო სტილის დიამეტრალურად შეცვლა ძალიან ძნელია, თუმცა ნელ–ნელა ყველაფერი მოგვარდება. ის ადაპტაციის პერიოდს საკმაოდ კარგად გადის."

"რაც შეეხებათ მსაჯებს, არ ვფიქრობ, რომ ისინი შეგნებულად უშავებენ რამეს რომელიმე გუნდის ფეხბურთელს. მათი განსჯა ძალზე ძნელია."

"ბარსელონა" ჩვენზე ხუთი ქულით წინაა, რადგან პირველი რაუნდი უკეთ ჩაატარა. იმედი მაქვს, მეორე წრეში უკეთ ვიასპარეზებთ და სეზონს მათ წინ დავამთავრებთ. ეს არის ჩვენი მიზანი."

"ხერესი" უნდა დავამარცხოთ და შემდეგ ვნახოთ, რას იზამენ "ბარსელონა" და "ატლეტიკო". კარგი იქნება, თუ მადრიდელები დახმარებას გაგვიწევენ."

"ჩემპიონთა ლიგა" უნიკალური გათამაშებაა. ამ გუნდს მისი მოგება მართლა სურს. ჩვენ ყველას საკუთარი მიზეზი გვაქვს, მაგრამ ყველაფერი მხოლოდ შემდეგი მეტოქის, "ლიონის" დამარცხებაზეა დამოკიდებული.