ლუკა მოდრიჩმა, ემილიო ბუტრაგენიოს თანხლებით, პირველი პრესკონფერენცია გამართა მადრიდის "რეალის" ფეხბურთელის რანგში.

"უდიდესი პატივია, მსოფლიოს საუკეთესო კლუბის წევრი იყო. ყველაფერი მაქვს, რაც განვითარებისთვის მჭირდება: საუკეთესო მწვრთნელი და საუკეთესო ფეხბურთელები. თამაშით საოცარ სიამოვნებას მივიღებ. ბედნიერი ვარ, ძალიან ბედნიერი. მოუთმენლად ველი გუნდთან ერთად ასპარეზობას, რადგან ეს უზარმაზარი გამოწვევაა ჩემთვის; უდიდესი გამოწვევა ჩემს კარიერაში. და დარწმუნებული ვარ, გოლებს გავიტან. ეს ერთ-ერთი უბედნიერესი დღეა ჩემს პროფესიონალურ ცხოვრებაში."

"მინდა, გუნდში საკუთარი ადგილი დავიკავო და ამისთვის ძალიან ბევრი მუშაობა დამჭირდება. ეს რთული იქნება, მაგრამ მე მზად ვარ. აქ ფეხბურთის სათამაშოდ და ყოველდღიური განვითარებისთვის მოვედი. მადრიდის "რეალთან" ერთად ტიტულების მოპოვება მსურს. ეს არის ჩემი ოცნება და პირადი გამოწვევა. ყველაზე კომფორტულად თავს ნახევარდაცვაში ვგრძნობ და იმედი მაქვს, იქ დავიმკვიდრებ პოზიციას, თუმცა სხვაგან თამაშიც შემიძლია. ამას მწვრთნელი გადაწყვეტს."

"მოლაპარაკებები დიდხანს გაგრძელდა, მაგრამ, საბოლოოდ, აქ ვარ. ბედნიერი და ამაყი გახლავართ, რომ მსოფლიოს უდიდეს კლუბში მოვხვდი. ყველაფრისთვის მზად ვარ. აქ სათამაშო ადგილის მოპოვება რთული იქნება, მაგრამ ვფიქრობ, სათანადო ღირსებები გამაჩნია. გადაწყვეტილება მწვრთნელზეა. მინდა ვისწავლო, განვვითარდე, გუნდს დავეხმარო და სიამოვნება მივიღო."

"უპირველეს ყოვლისა, მწვრთნელი მომწონს. იქ ვითამაშებ, სადაც ის გადაწყვეტს. ყველაფერს გავაკეთებ, რათა გუნდს დავეხმარო და მასთან ერთად გავიმარჯვო. ეს მსოფლიოს ერთ-ერთი საუკეთესო ჩემპიონატია, მადრიდის "რეალი" კი - საუკეთესო კლუბი. აქ უამრავ დიდებულ ფებურთელს უთამაშია, რომლებიც ამით ამაყნი იყვნენ".

"რამდენიმე მატჩი გამიცდა, მაგრამ თავდაუზოგავად ვვარჯიშობდი, ხორვატიის ნაკრებში 25 წუთიც ვითამაშე. იმედია, ფორმის პიკის მისაღწევად მხოლოდ რამდენიმე შეხვედრა დამჭირდება."

"ევროპის ჩემპიონატის დაწყებამდე გავიგე, რომ მადრიდის "რეალს" ჩემი შეძენა სურდა. 19 ნომრიან მაისურზე იმიტომ შევჩერდი, რომ დიდი არჩევანი არ მქონია."

"გუნდის სამივე მატჩი ვნახე და მხოლოდ ერთი რამ შემიძლია ვთქვა: სეზონის სტარტი ასეთი მნიშვნელოვანიც არ არის. "ლა ლიგაში" კიდევ უამრავი შეხვედრაა დარჩენილი, "ჩემპიონთა ლიგა" და "კოპა დელ რეი" კი ჯერ არც დაწყებულა."

"თავს კარგად ვგრძნობ, თუმცა ფეხბურთელების გაცნობა და გუნდთან ერთად ვარჯიში ჯერ კიდევ წინ მაქვს. "ბარსელონასთან" სათამაშოდ მზად ვარ, გადაწყვეტილებას მწვრთნელი მიიღებს. "ელ კლასიკო" მსოფლიოს ერთ-ერთი უდიდესი დაპირისპირებაა."

"მოურინიო მსოფლიოში საუკეთესო მწვრთნელია. ჩემი საყვარელი ფეხბურთელი კი ბობანი გახლავთ - ერთ-ერთი საუკეთესო ხორვატი მოთამაშე ისტორიაში. ტოტიც ძალიან მომწონს, "რომას" კაპიტანი, თუმცა - უფრო ბობანი."

"ტოტენჰემის" მადლიერი ვარ. ლონდონში ოთხი ფანტასტიკური წელი გავატარე. მინდა, მადლობა გადავუხადო ყველას, ვინც ამ პერიოდის განმავლობაში მე და ჩემს ოჯახს გვეხმარებოდა. უკმაყოფილების მიზეზი არ მაქვს, ჩემი მხრივ მხოლოდ კარგი მეთქმის. ახლა ცხოვრების ახალ გვერდზე ვარ. ყოფილ კლუბთან მხოლოდ სასიამოვნო მოგონებები მაკავშირებს."