დღეს მადრიდის "რეალი" მეათე მატჩს გამართავს სტუმრად "ჩემპიონთა ლიგაზე" ჟოზე მოურინიოს ხელმძღვანელობით. ჩატარებულ 9 შეხვედრაში გუნდი ჯერ არ დამარცხებულა - 6 გამარჯვება და 3 ფრე. ერთადერთი თამაში, რომელიც სამეფო კლუბმა პორტუგალიელის მოსვლის შემდეგ დათმო, შარშან შედგა "სანტიაგო ბერნაბეუზე", "ბარსელონას" წინააღმდეგ, 0-2.

გასულ წელს "ბლანკოსმა" ჯგუფში ორი გასვლითი მატჩი მოიგო (0-1 "ოსერთან" და 0-4 "აიაქსთან") და ერთი ფრედ ითამაშა (2-2 "მილანთან"), ფრედ ითამაშა 1/8 ფინალშიც (1-1 "ლიონთან") და გაიმარჯვა 1/4 ფინალში (0-1 "ტოტენჰემთან"). გუნდი არც "კამპ ნოუზე" დამარცხებულა ("ბარსელონა", 1/2 ფინალი, 1-1), თუმცა ეს საკმარისი არ აღმჩნდა ფინალში გასასვლელად.

მიმდინარე სეზონში "რეალმა" ჯგუფში სამივე მატჩი მოიგო სტუმრად - 0-1 "დინამო ზაგრებთან", 0-2 "ლიონთან" და 0-3 "აიაქსთან". ამას დაემატა სამი გამარჯვება "სანტიაგო ბერნაბეუზე" და მოურინიოს შეგირდებმა "ჩემპიონთა ლიგის" ისტორიაში საუკეთესო ჯგუფური ეტაპი ჩაატარეს.

უკანასკნელად სამეფო კლუბი სტუმრად მანუელ პელეგრინის თავკაცობისას დამარცხდა, "ლიონთან", 1-0. განმეორებითი შეხვედრა 1-1 დამთავრდა და 1/4 ფინალის საგზიური ფრანგებს დარჩათ. მას შემდეგ "რეალს" ანგარიშზე 6 გამარჯვება და 3 ფრე, 18 გატანილი და 4 გაშვებული გოლი დაუგროვდა.

ინფორმაციის წყარო: Marca.com