შაბათს სანტანდერის "რასინგის" დამარცხების შემთხვევაში, სამეფო კლუბს აქვს შანსი თითქმის იდეალურ მაჩვენებელს მიაღწიოს 18 შეხვედრაში მოპოვებული ქულების მიხედვით. 18 ტური - ეს პრაქტიკულად ერთი წრეა. ერთადერთი, რამაც მადრიდულ გრანდს ამ მართლაც უნაკლო სერიის გაგრძელებაში ხელი შეუშალა, - "ბარსელონასთან" ნაგემი მარცხია დეკემბრის "ელ კლასიკოში". ასეთმა წარმატებულმა სვლამ მოურინიოს გუნდს ხელი შეუწყო იმაში, რომ სატურნირო ცხრილში უშუალო კონკურენტს 10 ქულით გაქცეოდა და ფაქტიურად გაენაღდებინა 32-ე საჩემპიონო ტიტული.

"რეიდის" სტარტამდე, "თეთრები" იმ "ლევანტესთან" დამარცხდნენ, რომელსაც გასულ ტურში 4-2 მოუგეს, შემდეგ კი, ყველასთვის მოულოდნელად, სანტანდერშიც დაკარგეს ქულები, გათამაშების უმთავრეს აუტცაიდერთან. გასულ წრეში, "რასინგთან" ნათამაშევი მატჩის შემდეგ, მადრიდელებს მეხუთე პოზიცია ეკავათ. დღეს კი, თითქმის 5 თვის შემდეგ იმ მატჩიდან, ჟოზე მოურინიოს შეგირდები უდავო ლიდერები არიან, რაც სწორედ იმ 18-მატჩიანი უნაკლო სერიით აიხსნება.

მოგება-წაგებათა ბალანსი 17:1-ზეა. რაც შეეხება გატანილ გოლებს, "თეთრებმა" ამ 18 მატჩში 65 გოლი შეაგდეს (საშუალოდ 3,6 გოლი მატჩში). ერთადერთი სტატისტიკური მაჩვნებელი, რომელიც მოწონებას არ იმსახურებს, - 18 გაშვებული გოლია (1 გოლი საშუალოდ).

მიმდინარე გათამაშებაში "რეალმა" გაიმარჯვა ისეთ რთულ სტადიონებზე, როგორებიცაა ვალენსიური "მესტალია" და სევილიური "რამონ სანჩეს პისხუანი". გარდა ამისა, "თეთრებმა" შინ სძლიეს პრინციპულ მეტოქეებსაც, "ატლეტიკოსა" და "ბილბაოს" სახით. რაც შეეხება მატჩებს ადვილ მეტოქეებთან, რომელიც გასული წლის მადრიდის
"რეალისთვის" აქილევსის ქუსლი იყო, "თეთრებმა" სრული კონცენტრაცია შედეგზე გააკეთეს. მაგ: "ბლანკოსმა" სან-სებასტიანში "სოსიედადს" 0-1 ეთამაშა, ხოლო "ალფონსო პერესზე" "ხეტაფესაც" მინიმალური სხვაობით მოუგო. შეიძლება ვახსენოთ, კუნძულ მალიორკაზე მოპოვებული ურთულესი გამარჯვებაც.

გარდა უმნიშვნელოვანესი სამი ქულისა, მადრიდელები შაბათს კარის მშრალად შენახვასაც ეცდებიან, რაც მეტად პრობლემატური საკითხია საშინაო მატჩებში. ბოლოს ამის გაკეთება გუნდმა 26 დეკემბერს მოახერხა, როდესაც "ვილიარეალი" დაამარცხა (3-0). მას შემდეგ "თეთრები" საკუთარ მოედანზე რეგულარულად უშვებენ გოლს. აი, უკვე 11 მატჩია, რაც კასილასმა და ადანმა კარის მშრალად შენახვა ვერ შეძლეს.


ინფორმაციის წყარო: Marca.com