ნელ-ნელა ახლოვდება "ჩემპიონთა ლიგის" 1/8- ფინალური მატჩი, სადაც ერთმანეთს მოსკოვის "ცსკა" და მადრიდის "რეალი" დაუპირისპირდებიან. მატჩის გამართვამდე 4 დღით ადრე კი, "არმიელებმა" მორიგი ამხანაგური შეხვედრა ჩაატარეს და დონეცკის "შახტართან" ფრეს დასჯერდნენ.

როგორც იცით, მოსკოველებმა უშუალოდ სეზონის განახლებამდე (რუსული ლიგა დროებით შეწყვეტილია - ავტ.) ამხანაგური მატჩები გამართეს. წინასასეზონო ტურნეს მასშტაბით, ისინი ჯერ ესპანეთში იმყოფებოდნენ, ახლა კი თურქეთში ჩაატარეს ამხანაგური მატჩი. როგორც მოგახსენეთ, "არმიელთა" ბოლო მეტოქე უკრაინული დონეცკის "შახტარი" იყო.

თამამად შეიძლება ითქვას, რომ რუსეთის ყველაზე ტიტულოვანი კლუბის თავკაცმა, ლეონიდ სლუცკიმ, თითქმის ოპტიმალური შემადგენლობა გამოიყვანა მინდორზე. სავარაუდოა, რომ სწორედ ამ 11-ეულს ათამაშებს ის მომდევნო მატჩში, გაცილებით სერიოზულ მეტოქესთან, მადრიდის "რეალთან".

რაც შეეხება უშუალოდ მატჩის მიმდინარეობას, უკრაინელებმა წინ გასვლა 32-ე წუთზე შეძლეს, როდესაც გოლი ტეიშეირამ შეაგდო. 7 წუთის შემდეგ, საპასუხო ბურთი ტომიჩმა გაიტანა. პირველი ტაიმი ფრედ დასრულდა, თუმცა მეორე ნახევარი მოსკოველებმა დაიწყეს აქტიურად. მათ აქტიურობას მუსას მიერ 56-ე წუთზე გატანილი გოლი მოჰყვა. მიუხედავად ამისა, დენტინიომ მაინც მოახერხა ანგარიშის გაქვითვა და საბოლოო ანგარიში დააფიქსირა - 2:2.




ინფორმაციის წყარო: Pfc-CSKA.com