მორიგი მატჩი და მორიგი, აწ უკვე ჩვეული, რეკორდი კასილასის აქტივში... მომავალი მატჩი, რომელსაც "ბლანკოსი" "ლევანტესთან" გამართავს, იკერისთვის რიგით 437-ე იქნება "ლა ლიგაში", რითაც ის ლეგენდარულ სანჩესს გაუთანაბრდება. სანჩესს, რომლის ანგარიშზეც ყველაზე მეტი მატჩია "პრიმერაში" "ბლანკოსის" მაისურით (ამ შემთხვევაში, საუბარია სრულ მატჩებზე. სტატისტიკა არ ითვალისწინებს იმ შეხვედრებს, რომელშიც ამა თუ იმ ფეხბურთელს შეცვლაზე შესვლა მოუწია მინდორზე - ავტ.). ამ მხრივ, კასილასს გარკვეული უპირატესობაც აქვს. მან მხოლოდ 5-ჯერ ვერ შეძლო მინდორზე 90 წუთის დაყოფა.

იკერი მხოლოდ 30 წლისაა და "რეალთან" კონტრაქტი 2017 წლამდე აკავშირებს. გამოდის, წინ კიდევ არაერთი რეკორდი გველის მისი შესრულებით. ასე რომ, "რასინგთან" მატჩში, რომელიც 18- ში გაიმართება, "სან-იკერი" მორიგ რეკორდს დაამყარებს, გაასწრებს რა სანჩესს და ყველაზე მეტ მატჩს მოაგროვებს "ლა ლიგაში", "ლოს ბლანკოსის" ისტორიაში.

ამ წუთისთვის, იკერის ანგარიშზე 441 მატჩია "ლა ლიგის" ეგიდით (მათგან 5 არასრული). მის კარიერაში ყველაზე გამორჩეული შეხვედრა მაინც "ბილბაოსთან" იყო, როდესაც ახალგაზრდა იკერს მინდორზე გამოსვლის შანსი მიეცა, 39- ე წუთზე ბიზარის გაძევების შემდეგ. გარდა ამისა, კასილასს კიდევ 4-ჯერ მოუწია მოედნის დატოვება. 2-ჯერ ის მინდვრიდან გააძევეს: 2005/06 წლის მატჩში "ოსასუნასთან" (81-ე წთ.) და 2010/11 წლების სეზონში "ესპანიოლთან" (მე-2 წთ.); დანარჩენ ორ შემთხვევაში მან მოედნის ფარგლები ტრავმის გამო დატოვა: 2000/01 წლის მატჩში "დეპორტივოს" წინააღმდეგ (39-ე წთ.) და 2004/05 წლებში "ბეტისთან". იკერი "ხეტაფესთან" მოპოვებული გამარჯვების შემდეგ, "ლა ლიგაში" მოგებული მატჩებით ხენტოს გაუთანაბრდა (284).

თუ საქმე ყველა ტურნირზე მიდგება, კასილასის ანგარიშზე 603 მატჩია. თავისი საიუბილეო, მე-600 შეხვედრა მან "ატლეტიკთან" გამართა. გუნდთან, რომლის წინააღმდეგაც 1999 წელს დებიუტი ჰქონდა. "როდესაც წარსულზე ვფიქრობ და კარიერის გასულ წლებს ვიხსენებ, მხოლოდ მადლობა თუ მეთქმის იმ ხალხის მისამართით, ვინც მუდამ გვერდში მედგა. კარიერაში იყო ბევრი ემოციური მომენტი. დებიუტის დღე, პირველი გამარჯვება სამეფო თასზე, პირველი ლიგა კარიერაში, პირველი წარმატება ჩემპიონატში, პირველი ტრიუმფი ევროპისა და მსოფლიო ჩემპიონატზე - ყველაფერი ეს დამეხმარა იმაში, რომ საუკეთესოს წოდება მომეპოვებინა და შემენარჩუნებინა ის," - ასეთი განცხადება გამოაქვეყნა Facebook- ის თავის ოფიციალურ ვებ-გვერდზე კასილასმა "ატლეტიკთან" მატჩის შემდგომ.

ასე რომ, იკერი მორიგ რეკორდებს უმიზნებს. ამ წუთისთვის, "ბლანკოსის" მაისურით ჩატარებული მატჩებით რაულია ლიდერი. "ელ კაპიტანოს" ანგარიშზე 741 ოფიციალური მატჩია. ამ ისტორიულ რეკორდამდე კასილასს 138 მატჩი აშორებს. თუმცა, რაულამდე მას ლეგენდარული სანჩესისა (710) და სანტილიანას (645) ბარიერის გადალახვა მოუწევს.


ინფორმაციის წყარო: As