იკერ კასილასისთვის და ჩავი ერნანდესისთვის - მადრიდის "რეალისა" და "ბარსელონას" ორი აღზრდილისთვის - სამეფო თასის 1/4- ფინალური ეტაპის პირველი მატჩი, რომელიც "სანტიაგო ბერნაბეუზე" გაიმართება, რიგით 28- ე ურთიერთდაპირისპირება იქნება. მიუხედავად ორმხრივი დაძაბულობისა კლუბებს შორის, ეს ფეხბურთელები 1997 წლიდან მეგობრები არიან, როდესაც ისინი ესპანეთის 17- წლამდელთა ეროვნული ნაკრების ღირსებას იცავდნენ ეგვიპტის მსოფლიო ჩემპიონატზე.

გაზაფხულზე, "ჩემპიონთა ლიგის" "ელ კლასიკოების" შემდეგ, ყველას ისეთი შთაბეჭდილება დარჩა, რომ მათი ბავშვობის მეგობრობა უბრალოდ წარსულს ჩაბარდა. მიუხედავად ასეთი დაძაბული ვითარებისა, კაპიტნებმა დროულად შეძლეს სიტუაციის მოგვარება და კლუბებს შორის ურთიერთობის დამშვიდება.

აქამდე ჩავიმ და კასილასმა ერთმანეთის წინააღმდეგ 27 შეხვედრა გამართეს (22 - ლა ლიგაში; 2 - ჩემპიონთა ლიგასა და ესპანეთის სუპერთასზე; ერთი - სამეფო თასზე). მადრიდელთა კაპიტანმა მინდორი გამარჯვებულის რანგში 8- ჯერ დატოვა, ხოლო მისმა ვიზავიმ - 12-ჯერ. დარჩენილი 7 მატჩი ფრედ დასრულდა. ჩავის ანგარიშზე 3 გოლია, 2 - კასილასის კარში, 1 - სეზარ სანჩესის. საინტერესოა, რომ ხვალინდელი მატჩი მხოლოდ მეორე "კლასიკო" იქნება მათთვის სამეფო თასის ეგიდით. პირველი და ჯერ-ჯერობით უკანასკნელი მატჩი, როგორც იცით, მადრიდელთა გამარჯვებით დასრულდა "კოპას დელ რეის" ფინალში.

იკერისა და ჩავის დებიუტი "კლასიკოში" 2000 წლის 26 თებერვალს შედგა. ხსენებულ მატჩში "თეთრებმა" 3-0 დაამარცხეს მეტოქე, რობერტო კარლოსის, ნიკოლა ანელკასა და ფერნანდო მორიენტესის გოლებით. საჩემპიონო ტიტული იმ წელს ლა კორუნიაში, დეპორტივოსთან დარჩა. ჩავი - მეორე ფეხბურთელია "ბარსას" ისტორიაში ჩატარებული "კლასიკოების" რაოდენობით. ის მხოლოდ სეგარს ჩამორჩება, რომლის ანგარიშზე 31 მატჩია "რეალის" წინააღმდეგ. რაც შეეხება იკერს, მას ჯერ კიდევ 15 "კლასიკო" აქვს სათამაშო, რათა რეკორდსმენ მანუელ სანჩესს დაეწიოს (43 მატჩი "ბლაუგრანას" წინააღმდეგ).



რაც შეეხება ტიტულებს, ორივე მოთამაშეს - კასილასსაც და ჩავისაც - შეუძლიათ დაიკვეხნონ. ამ მხრივაც, კატალონიელს უპირატესობა აქვს. ამ უკანასკნელის ანგარიშზე 21 ტიტულია ("ჩემპიონთა ლიგა" - 3; "ლა ლიგა" - 6; სამეფო თასი - 1; ესპანეთის სუპერთასი - 5; ევროპის სუპერთასი - 2; მსოფლიოს საკლუბო ჩემპიონატი - 2; ევროპის ჩემპიონატი და მსოფლიოს ჩემპიონატი - 1). იკერის აქტივში 14 ტიტულია ("ჩემპიონთა ლიგა" - 2; "ლა ლიგა" - 4; სამეფო თასი - 1; ესპანეთის სუპერთასი - 3; ევროპის სუპერთასი - 1; საკონტინეტშორისო თასი, ევროპის ჩემპიონატი და მსოფლიო ჩემპიონატი - 1). რაც შეეხება ეროვნულ ნაკრებში ჩატარებულ მატჩებს, ჩავის ანგარიშზე უკვე 107 მატჩია (57 მატჩი ახალგაზრდულ ნაკრებში), როდესაც იკერს ესპანეთის ნაკრების მაისურით უკვე 127 შეხვედრა აქვს გამართული (მხოლოდ 41 მატჩი ახალგაზრდულ ნაკრებში).

ვის დარჩება გამარჯვება რიგით 28-ე "კლასიკოში" და ვინ დატოვებს მინდორს თავაწეული, სულ მალე გახდება ცნობილი. ვისარგებლოთ შემთხვევით და წარმატება ვუსურვოთ საყვარელი გუნდის კაპიტანს...


წყარო: As.com