Onda Cero- მ ესტებან გრანეროსთან დაკავშირებით მეტად მნიშვნელოვანი ინფორმაცია გააჟღერა. როგორც იცით, "პირატა" კლუბიდან წასვლასთან ძალზე ახლოს იყო, მაგრამ, Onda Cero- ზე დაყრდნობით, ის გუნდს აღარ დატოვებს.

ამავე ინფორმაციის თანახმად, კლუბის აღზრდილის "ბლანკოსში" დატოვების ინიციატორი მადრიდელთა დამრიგებელი გახლდათ. როგორც ჩანს, პორტუგალიელი უშუალოდ ფეხბურთელს შეხვდა და უთხრა, რომ მას ნდობას უცხადებდა, მიუხედავად მცირე სათამაშო დროისა სეზონის პირველ ნახევარში. ასე რომ, მოურინიოს სიტყვებმა ფეხბურთელს იმისკენ უბიძგა, რომ უარი ეთქვა მსურველებისთვის, როგორც მინიმუმ, ზაფხულამდე მაინც.

გრანერომ რამდენიმე წინადადება "პრემიერ-ლიგიდან", "ფიორენტინასგან" და "ოლიმპიაკოსისგან" მიიღო. რაც შეეხება ესპანეთს, "პრიმერას" გუნდებიდან მის მიმართ ინტერესს "რეალ ბეტისიც" იჩენდა. თუმცა, სამეფო კლუბს ფინანსური პრობლემების გამო გრანეროს შესყიდვა გაუჭირდა. გარდა "ბეტისისა", გრანეროს "მალაგაც" აკვირდებოდა. ბოლო ხანებში, იყო საუბარი მის გადაბარგებასთან დაკავშირებით "ლა როსალედაზე", თუმცა, მოურინიოს სიტყვებმა ყველაფერი შეცვალა.


ინფორმაციის წყარო: As