22 მოგება ბოლო 23 შეხვედრაში. მადრიდის "რეალმა" გუშინდელი გამარჯვებით თასის გათამაშებას "მალაგა" გამოთიშა და 1/4- ფინალში გავიდა, სადაც, 99,9%- ით მადრიდელთა მეტოქე "ბარსელონა" იქნება. მიუხედავად უდიდესი პატივისცემისა "ოსასუნას" მიმართ, გულშემატკივართა უმრავლესობის აზრით, "ლურჯ-წითლებს" მომდევნო ეტაპის საგზური ფაქტიურად განაღდებული აქვთ. ასე რომ, 18 და 25 იანვარს მთელი მსოფლიო მორიგი "ელ კლასიკოების" მოლოდინშია, ამჯერად, სამეფო თასზე.

მოურინიომ საკმაოდ სოლიდური სასტარტო 11- ეული გამოიყვანა მინდორზე. არბელოამ და პეპემ ძირითადში დაიწყეს. "ბერნაბეუზე" მოგებული მატჩის შემდეგ, მცირე უპირატესობა სტუმრებს ჰქონდათ. თუმცა, "ლურჯ-თეთრების" ნებისმიერი გოლი შესაძლოა სარისკო ყოფილიყო. პირველი ტაიმის მიწურულს რამოსს ჰქონდა გატანის შანსი, თუმცა, ამაოდ. სამწუხაროდ, 43- ე წუთზე მოურინიოს იძულებითი ცვლილების განხორციელება მოუწია. ხედირამ ტრავმა მიიღო, ხოლო მინდორზე იოზილი შემოვიდა.

მეორე ტაიმშივე მოედანზე მარსელო შემოვიდა. ბრაზილიელმა თანამემამულე შეცვალა. ამის შემდეგ, რონალდუსაც მიეცა გატანის შანსი, მაგრამ კაბალერომ შეძლო ბურთის მოგერიება. ბენზემას მოედანზე გამოყვანამ კიდევ ერთხელ გაამართლა. ფრანგმა კვლავ გამარჯვების გოლი გაიტანა და გუნდი მომდევნო ეტაპზე გაიყვანა. აღსანიშნავია, მასპინძელთა მეკარის დაუშვებელი შეცდომაც. გეტყვით იმასაც, რომ "თეთრები" მომდევნო ტურში "მალიორკას" შეხვდებიან, რომელმაც, ყველასგან გასაკვირად, "სოსიედადს" 6-1 მოუგო გუშინ საღამოს.