არავისთვის წარმოადგენს საიდუმლოს, რომ ზინედინ ზიდანს პრესასთან ურთიერთობა მაინცდამაინც არ უყვარს. მაგრამ ყველას გასაკვირად "მადრიდის" პირველი გუნდის დირექტორი თავად დაუკავშირდა ესპანური გაზეთის, "ასის", ჟურნალისტებს და "ბლანკოსის" ირგვლივ აგორებული კრიტიკის შესახებ ინტერვიუს ჩამორთმევა ითხოვა.

ვიცით, რომ პრესასთან ურთიერთობის მოყვარული არ ხართ. რატომ გადაწყვიტეთ "ასის" ჟურნალისტებთან დაკავშირება?
ძალზე უსამართლოდ მომეჩვენა კრიტიკა, რომელიც სამეფო კლუბის მწვრთნელსა და მოთამაშეებს დაატყდათ თავს "ბარსელონას" წინააღმდეგ გამართული შეხვედრის შემდეგ. არ მესმის იმ სქემის კრიტიკა, რომელიც ამ მატჩისთვის მოურინიომ აირჩია. შეიძლება ნებისმიერ სქემაზე შეჩერდე, მაგრამ რას იზამ, თუ შენი მეტოქეა გუნდი, რომელიც ამ წუთისთვის ერთი ნაბიჯით გისწრებს. შესვენებაზე "მადრიდი" 1-0 - ს იგებდა, ყველა კმაყოფილი იყო, რადგან წინ ვიყავით. მე სტადიონზე გახლდით და ერთი ადამიანისგანაც კი არ გამიგია კრიტიკის თუნდაც ერთი სიტყვა მწვრთნელის მიერ არჩეული სქემის მისამართით. შეხვედრამდე ყველა დაკავებული იყო იმით, რომ "რეალის" სასტარტო შემადგენლობის გამოცნობას ცდილობდა, პირველი ტაიმის შემდეგ კი ისინი ჩუმად ისხდნენ, რადგან ხედავდნენ, რომ ყველაფერი ფუნქციონირებდა. მერე შეცდომა დავუშვით და სტანდარტული მდგომარეობიდან პუიოლის გოლი მივიღეთ. ამან ძალიან დიდი ზიანი მოგვაყენა.

მოდით, პირდაპირ ვთქვათ, ეს იყო უდიდესი შეცდომა გუნდისა, რომელიც "ვალდებებასზე" დახურულ კარს მიღმა ვარჯიშობს სწორედ იმისთვის, რომ ასეთ სათამაშო სიტუაციებს მშვიდად შეხვდეს!
სტანდარტული მდგომარეობებიდან ძალზე ცოტას ვუშვებთ. შეგიძლიათ სტატისტიკა გადაამოწმოთ, ის, უეჭველად, დადებითია. მოთამაშეებმა, მწვრთნელმა, დიახ, ყველამ იცის ამის შესახებ. დიახ, ჩვენ შეცდომა დავუშვით. ყველა გრანდი უშვებს შეცდომას, რომელიც შემდგომ მათ უდიდეს ზიანს აყენებს. მაგრამ პირადად მე ყველაზე მეტად სათამაშო სქემაზე თავდასხმა მაღიზიანებს. ვშიშობ, მსოფლიოში არცერთმა მწვრთნელმა არ იცის, რომელი ტაქტიკური სქემაა შესაფერისი "ბარსელონასთან" ბრძოლისთვის.

მაგრამ თქვენ ხომ თავად საფეხბურთო ელეგანტურობა ხართ... იმას ხომ არ იტყვით, რომ ასეთი თამაში ლამაზია?
არ გეთანხმებით. დადგა დრო, როდესაც თამაშის ერთადერთი სილამაზე გამარჯვებაა. პირველ რიგში აქ ყველანი იმისთვის ვართ, რომ მოვიგოთ, მოვიგოთ და კიდევ ერთხელ მოვიგოთ. რასაკვირველია, ისეთ კლუბს, როგორიც "მადრიდია", სილამაზე სჭირდება, მაგრამ მოცემულ მომენტში, უძლიერეს მოწინააღმდეგესთან ბრძოლისას, თავდაპირველად გამარჯვებისთვის აუცილებელი პირობების შექმნაა საჭირო. ოთხშაბათს სამი ძალზე ნიჭიერი თავდამსხმელით ვიასპარეზეთ. რა თქმა უნდა, ათასობით ეპიზოდი არ შეგვიქმნია, თუმცა საკუთარი თამაში ვაჩვენეთ და საინტერესო ჩანაფიქრებიც გვქონდა.

მაგრამ განა შეიძლება "მადრიდმა" ასე ითამაშოს?
რატომაც არა? რატომ არ შეიძლება? დროებით თვით "მადრიდსაც" შეუძლია შედეგი სტილზე წინ დააყენოს. და "მადრიდს" აქვს უფლება, თქვას: "დღეს საჭიროა ყველაფრის გაკეთება, რათა მოვიგოთ; ამისთვის შესაძლებელია სხვა რაღაცების დათმობა". ეს არა მხოლოდ ფეხბურთში, არამედ ნებისმიერი ადამიანის ცხოვრებაში ხდება. ზოგჯერ სპეცტანსაცმლის ჩაცმა და მაღაროში ჩასვლა გიწევს, შავი სამუშაოს შესასრულებლად. ოთხშაბათს გუნდის ტაქტიკა ორიენტირებული იყო იმაზე, რომ, ბურთის ნაკლებად ფლობისას, სხვა გზები მოგვეძებნა.

განა ეს არ ზღუდავს მოთამაშეებს? თქვენ მიიღებდით თამაშის ასეთ მოდელს?
რას ნიშნავს "მიიღებდით"? შეკითხვა ასე არ დგას. ჩვენ განსაზღვრული სქემით ვმოქმედებდით და ამან მოიტანა კიდეც შედეგი პირველ ტაიმში. ქარიმის შესანიშნავი გადაცემა, კრიშტიანუს დიდებული დარტყმა და გოლი. წინ ვიყავით. "მადრიდის" სიძლიერე კონტრშეტევაზე თამაშიცაა. საკუთარ იარაღზე უარის თქმას არ ვაპირებთ.

ნამდვილად შეშფოთებული ჩანხართ, შეიძლება ითქვას - გაბრაზებულიც...
უბრალოდ, არ მესმის, როდესაც რამდენიმე ადამიანი პრესაში "მადრიდს" აკრიტიკებს, მაშინ, როდესაც მათი მთავარი მოტივაცია მოურინიოსთან პირადი ანგარიშებია. როგორ შეიძლება საერთოდ ლაპარაკი მწვრთნელის შეცვლის აუცილებლობაზე? გიჟები ვართ თუ რა ხდება? გაგვიმართლა, რომ გუნდში მოურინიო გვყავს, მწვრთნელი, რომელმაც ყველაფერი შეცვალა და ბევრად ძლიერი "მადრიდი" ააშენა. მოურინიოსა და მოთამაშეებზე თავდასხმა "მადრიდზე" თავდასხმას ნიშნავს. ხშირად ვარ "ვალდებებასზე" და საკუთარი თვალებით ვხედავ ფეხბურთელთა მუშაობას. მოურინიო ცდილობს, შექმნას "რეალი", რომელიც საუკეთესო იქნება და ყველაფერს მოიგებს. მან ჩვენს გუნდში განსაკუთრებული სტილი მოიტანა. თქვენ წარმოდგენაც კი არ შეგიძლიათ, რამდენად ჩართულია კლუბის თითოეული წევრი ამ პროექტში. მათ შორის - მოთამაშეებიც.

დარწმუნებული ხართ, რომ ეს ყველას ეხება?
აბსოლუტურად. აღმაშფოთებს, როდესაც ჩვენს ფეხბურთელებს ასე ძლიერად ესხმიან თავს. ისინი პატივისცემას იმსახურებენ იმისთვის, რასაც აკეთებენ. არ მესმის ასეთი მძაფრი კრიტიკა მათი მისამართით.



იცავთ რა მოთამაშეებს, თქვენ იცავთ მოურინიოსაც. რატომ?
იმიტომ, რომ მოურინიო გამარჯვების წინაპირობებს ქმნის. ყურადღებით დააკვირდით გუნდის ასპარეზობის სტატისტიკას მას შემდეგ, რაც ის მოვიდა. ეს დაუჯერებელია. ყველაფერი ეს დაუჯერებელია. და იგი ამ მიღწევების მთავარი მიზეზი გახლავთ. ვიღაცას ეჭვი ეპარება მის ერთგულებაში "მადრიდის" მიმართ და ამბობს, რომ ის, ორი წელია, აქაა, შემდეგ კი წავა. სიმართლე გითხრათ, მირჩევნია, მწვრთნელმა ორი-სამი წელი იმუშაოს და რაღაც მნიშვნელოვანს მიაღწიოს, ვიდრე - ათი წელი და ვერაფერი გააკეთოს. თავად განსაჯეთ: "ინტერში" მან ორი წელი იმუშავა, მაგრამ როდესაც საუბარი იმ პერიოდს ეხება, კლუბს უღრმესი პატივისცემით იხსენებს.

თქვენ გენდომებოდათ ასეთი მწვრთნელი?
რა თქმა უნდა. ზუსტად ისე, როგორც ყველა ფეხბურთელს, ვისაც ოდესმე მასთან უმუშავია. ის მკაცრი მწვრთნელია, ეს მართალია, მაგრამ ის აიძულებს მოთამაშეებს, გაიგონ, რას ნიშნავს გამარჯვების უნარი. ის დაბადებით გამარჯვებულია. მისი მეთოდები შეიძლება მოგწონდეთ ან არ მოგწონდეთ, მაგრამ შემიძლია დაგარწმუნოთ, რომ იგი მუდამ იცავს საკუთარ ფეხბურთელებს და მუდამ პოულობს საჭირო სიტყვებს. ახლა ისეთ თანამდებობაზე ვარ, რომ საშუალება მეძლევა, დავინახო ყველაფერი, რაც "ვალდებებასზე" ხდება. და ვხედავ, უპირველეს ყოვლისა, დიდებულად შესრულებულ სამუშაოს. არ დაგავიწყდეთ, რომ ორი გრანდის ეპოქაში ვცხოვრობთ; ორი გრანდის, რომლებიც ესპანურ ფეხბურთში დომინირებენ. ამ გრანდებიდან ერთ-ერთი დროებით მეორეზე წინ იმყოფება. მაგრამ - მხოლოდ დროებით.

რას იტყვით პეპეს საქციელზე "ბარსელონასთან" მატჩში?
პეპე არის ფეხბურთელი, რომლის ხმას მოედნის ფარგლებს გარეთ საერთოდ ვერ გაიგებთ. ის შესანიშნავი ადამიანია, ბრწყინვალედ აღზრდილი. მაგრამ როდესაც მინდორზე გამოდის, მთელი არსებით ერთვება თამაშში და გამარჯვების წყურვილი იპყრობს; ეს აღტკინება ზოგჯერ საზღვრებს სცდება და მას შეცდომების დაშვებისკენ უბიძგებს. რა თქმა უნდა, იგი ნანობს, რაც ჩაიდინა, მაგრამ პეპე ერთ-ერთია იმ მოთამაშეთაგან, რომლებიც უკანასკნელს იღებენ მოედანზე. ხანდახან მას ბალანსის დაცვა უჭირს.

ვიღაცამ თქვა, რომ პეპე არ შეესაბამება "მადრიდის" ღირებულებებს... რას ფიქრობთ ამის შესახებ?
მინდა ამ ხალხს ვურჩიო, კარგად დააკვირდნენ, რას აკეთებს პეპე მადრიდის "რეალისთვის". როგორც ჩვენი გუნდის სხვა ფეხბურთელები, პეპეც მშვენივრად აცნობიერებს, რომ "მადრიდის" იმიჯს წარმოადგენს და, ამიტომ, ამ იმიჯს პატივისცემით ეპყრობა. როდესაც მინდორზე გადიხარ, მატჩის ზეწოლამ შეიძლება ბევრი რამ შეცვალოს.

როდის შეწყდება მოურინიოს "მადრიდის" კრიტიკა?
ფეხბურთში, ისევე, როგორც ცხოვრებაში, ყველაფერი ციკლების მიხედვით ხდება, ასე რომ - სიტუაცია შეიცვლება. მე ახლა ისე ვლაპარაკობ, როგორც ვილაპარაკებდი, მოთამაშე რომ ვყოფილიყავი. უსამართლოდ მეჩვენება, რომ ასე ძლიერად აკრიტიკებენ ამ მწვრთნელსა და ამ ფეხბურთელებს. არასწორია, კალმის ერთი მოსმით გადახაზო ჯადოსნურ გამარჯვებათა მთელი სერიები. ისინი, ვინც ამბობენ, რომ მესი და "ბარსელონას" სხვა მოთამაშეები სათანადო სიმაღლეზე არ იყვნენ, უნდა მიხვდნენ, რომ ეს სწორედ მოურინიოს არჩეული სქემის დამსახურებაა, რომელმაც ძალიან შეზღუდა მოწინააღმდეგე.

რას იტყვით კრიშტიანუსკენ მიმართულ კრიტიკაზე?
ხალხმა უნდა გააცნობიეროს, ვინ არის კრიშტიანუ. ის სამაგალითო პროფესიონალია, რომელიც საკუთარ სამუშაოს ისე ასრულებს, როგორც - სხვა ვერავინ. დაე, არავის შეეპაროს ეჭვი მის სიყვარულსა და ერთგულებაში "მადრიდის" მიმართ. ისინი, ვინც მას ეგოისტს უწოდებენ, ცრუობენ.

მაგრამ ყველა გაღიზიანდა იმით, რომ მან გოლი არ აღნიშნა...
და რა? ადამიანს არ აქვს უფლება, რომელიმე დღეს კარგ ხასიათზე არ იყოს? ის ძლიერი ადამიანია და მის ძარღვებში ცხელი სისხლი ჩქეფს. საჭიროა მისი მიღება და შეყვარება ისეთად, როგორიც არის, მთელი თავისი ნიჭითა და ნაკლოვანებებით. კრიშტიანუს გაცილებით მეტი დადებითი თვისება აქვს, ვიდრე - უარყოფითი.

საუბრის ბოლოს არ შემიძლია არ შეგეკითხოთ ქარიმ ბენზემას შესახებ...
ქარიმი სრულად ახდენს საკუთარი ტალანტის დემონსტრირებას. ის ბევრს მუშაობს; მიხვდა, რომ მსოფლიოს უდიდეს კლუბში იმყოფება. მწვრთნელისა და პარტნიორების ნდობის დახმარებით მან ბევრი რამ ისწავლა. აი, რას გეტყვით: ქარიმი ჯერ კიდევ ახალგაზრდაა, მისი საუკეთესო თამაში წინაა.

დიდი მადლობა, ზიზუ!
მადლობა თქვენ.